Alfonso Marino
VIENTE ’E PATE
Alfonso Marino è nato nel 1948 a Napoli vive a Sabaudia. Si occupa di scrittura poetica per i più piccoli (con relative illustrazioni), di traduzioni in napoletano di poeti da tutto il mondo. Produce collage artistici e verbo–visivi.
JOSHUA
per Joshua B.
Nu criaturo e na vela ca ’o porta
’o porta p’ ’o mare e p’ ’o cielo,
’ncopp’ ’e spalle nu nomme pesante.
Nu criaturo va ’ncontro ô mistero.
Un bambino, una vela lo porta / lo porta per cielo e per mare / sulle spalle un nome pesante./ Un bambino va incontro al mistero.
MAMMÀ
a mia madre
Spisso me torna mmente na canzone
e sento, allora, ’a voce fina e ddoce
ch’ accumpagnava ’o juoco ’e nu criaturo.
Me passa nnànze a ll’ uocchie chella stanza,
na machina pe’ cósere, buttune,
retaglie ’e stoffa… ’e juoche ’e nu criaturo.
Spesso mi torna in mente una canzone / e sento, ora, la voce dolce e fine / che accompagnava il gioco di un bambino. // Passa davanti agli occhi quella stanza / una macchina per cucire, bottoni / ritagli di stoffa… i giochi di un bambino.
*
Ògni matina appena sto scetato
tu viene a t’ arrubbà tutt’ ’e penziere
pe tutt’ ’o juorno nun me lasse ’e père
e sulo quanno dormo te nne vaie.
Ogni mattina appena sono sveglio / vieni a rubare tutti i miei pensieri // per tutto il giorno non mi lasci in pace / e solo quando dormo te ne vai.
*
L’addore d’ ’a vita
se spanne p’’a casa
ancora addurmuta.
’A siente, e cu ll’uocchie
ancora nzerrate
tu vide nu lago durato
addò se arreposano
’e suonne
che danno ricietto
ô dulore
L’addore d’ ’a vita.
L’ addore d’ ’a vita.
’O ccafè.
L’odore della vita / si spande per la casa / ancora addormentata / lo senti e con gli occhi / ancora chiusi / vedi un lago dorato / dove riposano / i sogni / che danno tregua / al dolore. // L’odore della vita /L’odore della vita. / Il caffè.
*
Acqua ca scenne
’a chistu cielo niro,
chiummo chiummo pesante
’ncopp ’e core,
’e chiste nire
d’africa e nustrane,
ch’ arrevotano
nfretta e disperate
’e rimme
dint’ ’e spire
’e chesta vita.
Acqua che scende / da questo cielo nero / piombo, piombo pesante / sul cuore / di questi neri / d’africa e nostrani / che rivoltano / in fretta e disperati / i remi / nei gorghi / della vita.
*
Chi ’o ssà pecché
nun simme maie cuntente,
dduie uocchie nire
’na jurnata ’e sole,
ce abbruciano ’int’ ’o core
poco tiempo surtanto.
Doppo currimmo ancora
areto ô fummo
cu’ ’e spalle sempe
cchiù pesante ’e chiummo.
Chissà perché / non siamo mai contenti, / due occhi neri / una giornata di sole /bruciano in cuore / soltanto per poco. / Dopo corriamo ancora / dietro al fumo / con le spalle sempre /più pesanti di piombo.
*
FIGLIE
’E figlie songhe vele
viente ’e pate.
Maistrale spisso
tu pe’ me si’ stato,
e a vvote calmo e ddoce
m’ he purtato.
I figli sono vele / i padri vento. / Sei stato per me, / spesso, maestrale,/ talvolta calmo e dolce / mi hai condotto.